|
|
Неустроев Б. Ф. Ойуу тыла. Айыы тыла / Мандар Уус. – Дьокуускай : Бичик, 2004. – 208 с.
Норуот маастара, тимир ууһа, ойууһут Борис Федорович Неустроевы – Мандар Ууһу билбэт саха саҥалаах суоҕа буолуо. Кини бу Орто туруу бараан дойдуга киһи гынан киэптэнэн кэлэн олорон, айар-тутар сырдык Аартыгын арынан, дьонун-дойдутун туһугар киэҥ далааһыннаахтык үлэлии-хамныы сылдьар, тумус туттар, сүдү айылҕалаах дьоммутуттан биирдэстэрэ. Кини саханы ааттатар айымньылаах олоҕун, дириҥ ис хоһоонноох саҥатын-иҥэтин тулалыыр дьон сөҕө-махтайа көрөн-истэн, иҥэринэллэр уонна ол онтон ылбыттарын бэйэлэрин олохторун суолларын солоноллор.
Эһиэхэ кэпсиир кини кинигэтин, күндү ааҕааччым, эн урут аахпыт да буоллаххына, баҕар атын өттүттэн арыйан, сэргээн эмиэ илиитигэр ылаарай дуу диэн, онтон олох да хайыһан болҕомтотун уурбатах ааҕааччыбар, тохтуу түһэн, ходьох гынан, туох эрэ тыыппалааҕын билинэн, бу кинигэни көрдүүр аакка киирээрэй диэн, кэтэхпитигэр кистии соҕус туппут баҕа санаалаах саҕалаатахпыт буолуохтун.
Хантан эрэ биллибэт хааһахтан оруу тардан ылар курдук суккуллар уус-уран тылынан-өһүнэн абылыыр бу кинигэ. Былыргы өбүгэм Улуу Олоҥхоһут Аан Ийэ дойдутун анааран, этэн-тыынан эрэрин санатар дьикти күүстээх, этитиинэн кэлбит иччилээх-илбистээх. Дьэ ол тылынан-өһүнэн суккуйан, билиҥҥи саха киһитэ төбөтүн дуомунан толкуйдаан биликтэһэн, эрэй-муҥ эҥэрдэһэн, ыарыы-ынчык ындыыланан, ойор Күнэ өлбөөрбүтүн сүрэҕинэн-быарынан чугастык ылынан, атын суолу арыйан анаарбыта дьикти, тобулбута туску.
Эн саха буолан төрөөҥҥүн, тылыҥ күүһүнэн тардаҥҥын, олоҕуҥ оҥкулун уһансар ытык ыйаахтаах буоларгын соһута-өмүрдэ аһан биэрэр дьикти түгэҥҥин бэлэхтиэ.
Күн Айыы киһитэ барахсан, кэрэхсэнэр кэрэ кэмиҥ кэрэһитэ буолбут киэҥ туттар киһибит кинигэтин ылаҥҥын, чуумпуран олорон, Ийэ тылыҥ сүмэтигэр сөтүөлээн, сүр күрүөҕүн аһаҥҥын, Орто дойдуҥ олоҕун оройдотор оҥоһууҥ-ыйааҕыҥ тосхойдор ханнык!
Куораттааҕы киин бибилэтиэкэ сахалыы салаатыттан бу кинигэни сураһыаххын, булуоххун сөп. Маны таһынан, Мандар Уус маннык кинигэлэрин эбии билсиэххитин сөп:
1. Саха орнаменнара / ЕНМЦ МК РС(Я) ; предисл. С. В.Гаврильевой. - Дьокуускай : [б.и.], 1990. - 99 с. : ил.
2. Саха ойуута-бичигэ = Узоры и орнаменты саха : [альбом] / Мандар Уус ; [авт. идеи И. М. Андросов].- Якутск : Бичик, 2007. - 287 с. : ил. ; 30 см.
3. Көмүс үүстарыгар көмө / Б.Ф.Неустроев ; [оформ.М. Г. Старостина]. - Дьокуускай : Бичик, 1994. – 39 с. : ил.
4. Саха туоһа : альбом. - Дьокуускай : Бичик,1996. - 96 с. : ил.
5. Саха ойуута-мандара : альбом / худож. Н. К.Окоемов. - Доп.изд. - Дьокуускай : Ситим, 1994. - 72 с. : ил.
http://www.ysia.ru/full-news.php?id_news=20854
http://www.yakutiashop.ru/shop/UID_40.html
http://ytylib.narod.ru/mandar.htm
http://www.sakha.gov.ru/node/39516
http://mirkovki.ru/content/vystavka-yarmarka-yakutskikh-nozhei-uus-ekspo-2011
Галина Слепцова
|
;)
